«Այբ» կրթական հիմնադրամի նախաձեռնությամբ կայացավ կրթական ու բարեգործական երկրորդ ForMath-ը։ Կրթական հնարավորությունները բազմապատկելու կարգախոսով մրցույթն այս տարի մաթեմատիկայի շուրջ միավորել էր Հայաստանում գործող առաջատար հինգ ընկերությունների՝ «Կոնվերս բանկ»-ի, Team Telecom Armenia-ի, «Թել-Սել»-ի, «Սոֆթ Կոնստրակտ»-ի թիմերին և «Քան» ակադեմիայի հայաստանյան գրասենյակի տեղայնացնողների թիմին։ Հինգ փուլերի արդյունքում հաղթող ճանաչվեց մրցույթը հյուրընկալած «Սոֆթ Կոնստրակտ» ընկերության թիմը, որը եզրափակիչում միավորներով գերազանցեց Team Telecom-ի թիմին։   ForMath-ի նպատակն է բնագիտամաթեմատիկական առարկաների ու կրթության կարևորության շուրջ միավորել Հայաստանում գործող այն կազմակերպություններին, որտեղ ոլորտային, մասնագիտական ու համընդհանուր զարգացման համար մաթեմատիկական գիտելիքն առանցքային է, և միասնական ներդրում ունենալ ՀՀ-ում և Արցախում հայալեզու որակյալ կրթական ռեսուրսներն անվճար հասանելի դարձնելու գործում։   Մասնակից թիմերի անդամավճարներն ամբողջությամբ ուղղվում են միջազգային խոշորագույն առցանց կրթական շտեմարանի՝ «Քան» ակադեմիայի կրթական որակյալ նյութերի տեղայնացմանը, որով 2017-ից ի վեր զբաղվում է «Այբ» կրթական հիմնադրամը։   Հարթակի նյութերը հայերեն են, անվճար և համապատասխանեցված են ՀՀ կրթական պետական չափորոշչին՝ ապահովելով ուսումնառության շարունակականությունը բոլորի համար և ամենուրեք։ Սա հատկապես կարևոր է երեխաների կրթական իրավունքը խախտող արտակարգ այնպիսի իրավիճակներում, ինչպիսիք են համավարակը, պատերազմը կամ շրջափակումը։   Մրցույթի մասնակիցներին ուղղված խոսքում հիմնադրամի գործադիր տնօրեն Սոնա Կոշեցյանը նշել է․ «Ձեր աջակցությամբ և մասնակցությամբ դուք նպաստում եք «Քան» ակադեմիայի հայալեզու հարթակում ևս մեկ բաժնի տեղայնացմանը։ Դուք նվիրում եք հնարավորություն ո՛չ միայն երեխաներին, այլև ուսուցիչներին՝ օգտվելու անվճար ու որակյալ կրթական բովանդակությունից՝ անկախ գտնվելու վայրից, հնարավորություն՝ ցանկացած տարիքում ինքնակրթվելու, սովորելու և խաղալու։ Սա յուրահատուկ բարեգործություն է, որը յուրաքանչյուրն անում է իր գիտելիքով, մասնակցությամբ և ներդրումով»։   Առաջին ForMath-ը կայացել էր 2021-ին՝ ներգրավելով հիմնականում ՏՏ ոլորտը ներկայացնող 8 կազմակերպությունների։ Մրցույթի արդյունքում հավաքված գումարով տեղայնացվել է մաթեմատիկայի ավելի քան 65 տեսանյութ, որոնք այսօր անվճար հասանելի են «Քան» ակադեմիայի հայալեզու հարթակում բոլոր սովորողների, ծնողների և ուսուցիչների համար։

Հունվարի 16-ին «Այբ» կրթական հիմնադրամը և «Իդրամ» վճարային համակարգը հուշագրի ստորագրմամբ ազդարարեցին կրթության շուրջ իրենց համագործակցության մասին։ «Իդրամ» ընկերությունն աջակցելու է «Այբ» կրթական հիմնադրամի զանգվածային մրցույթներին։ Մեկնարկն արդեն իսկ տրվել է  հայերենի «Մեղու 2022» մրցույթի  շրջանակում։   Գրագետ ու մրցունակ սերնդի կայացման ձգտումով երկու կառույցները պատրաստակամ են համագործակցելու կրթական նախաձեռնությունների շուրջ։   Ըստ «Այբ» կրթական հիմնադրամի գործադիր տնօրեն Սոնա Կոշեցյանի՝ շատ ուրախալի է, որ հայերենի «Մեղու» մրցույթին միացել է «Իդրամ»-ի նման մեծ կազմակերպություն. «Գնահատելի է, որ «Իդրամ»-ի հետ գործակցությունն այսքանով չի սահմանափակվելու, և «Այբ»-ի տարբեր մրցույթների շրջանակում մեր գործընկերների հետ համատեղ հնարավոր կլինի ոչ միայն մեծացնել հետաքրքրությունը դպրոցական առարկաների հանդեպ, այլև վաղ հասակից զարգացնել ֆինանսական գրագիտության հմտություններ»։   «Իդրամ»-ի տնօրեն Արսեն Քդենյանի խոսքով՝ ընկերության համար մեծ պատիվ է դառնալ կրթական բացառիկ մրցույթների գործընկեր։ «Հույս ունենք, որ հետագայում է՛լ ավելի կընդլայնվի համագործակցության շրջանակը և մեր դպրոցականները հնարավորություն կունենան բացի հիմնական առարկաների գծով գիտելիքներից ստանալ լրացուցիչ հարթակներ օրինակ ֆինանսական բնագավառում իրենց տեղեկացվածությունը բարձրացնելու համար։ Այդ նպատակով մենք ստեղծել ենք նաև  «Իդրամ Ջունիոր» հավելվածը, որը վստահ ենք՝ պատանիները մեծ հետաքրքրությամբ կուսումնասիրեն և կօգտվեն»,- նշեց Արսեն Քդենյանը։   Դեկտեմբերի 26-ին և 27-ին աշխարհում հայերենի ամենամեծ դպրոցական մրցույթն իր շուրջ համախմբել էր ՀՀ և Արցախի 3-12-րդ դասարանների հազարավոր երեխաների՝ 7800 գրանցված մասնակցի։ Դեկտեմբերի 19-ին այն առանձին փուլով անցկացվեց նաև սփյուռքի հայալեզու սովորողների համար։   Գործընկերության շրջանակում իրագործվելու են ֆինանսական գրագիտությանը նվիրված միասնական դասընթացներ, որոնց ընթացքում «Իդրամ»-ը կներկայացնի 8-16 տարեկան երեխաների համար նախատեսված իր «Idram Junior» բջջային հավելվածը։ Վերջինս գրպանի անկանխիկ գումարի կառավարումը սովորելու հնարավորություն է երեխաների համար, իսկ ծնողներին թույլ է տալիս վերահսկել երեխաների ֆինանսական գործողությունները։        «Այբ» կրթական հիմնադրամը շահույթ չհետապնդող հանրային կառույց է, որը կրթական ծրագրեր է իրականացնում Հայաստանի Հանրապետությունում, Արցախում և սփյուռքում 2006 թվականից ի վեր։ Միայն «Այբ»-ի դպրոցական մրցույթները մեկնարկից ի վեր ունեցել են 739 000 մասնակից։

«Քան» ակադեմիայի անվճար հայալեզու հարթակի հարուստ կրթական շտեմարանն այժմ կարող են կիրառել Արմավիրի և Գեղարքունիքի մարզերի 52 դպրոց, 90 ուսուցիչ և 313 աշակերտ։ Մասնակցելով «Քան» ակադեմիայի անվճար աշխատարանների շարքին՝ երկու մարզերի ուսուցիչներն ու դպրոցականները սովորել են արդյունավետ օգտվել համաշխարհային կարգի որակյալ ռեսուրսներով հագեցած, աշխարհում խոշորագույն առցանց կրթական հարթակից։     Աշխատարանները կազմակերպվել էին NEF-ի (Near East Foundation) կողմից իրականացվող «ՁԳՏՈՒՄ ավելի լավ ապագայի. համայնքների և քաղաքացիական հասարակության դիմակայունություն Հայաստանում» (STRIVE) ծրագրի շրջանակում՝ որպես «Քան» ակադեմիայի նախաձեռնության մաս։ Դրանք նպատակ ունեին ինքնակրթության և հիբրիդային կրթության ժամանակակից միջոցներով զինելու մարզերի ուսուցիչներին և աշակերտներին։   Այս նախաձեռնության երկրորդ նպատակն է մինչև ուսումնական տարվա ավարտ հարստացնել «Քան» ակադեմիայի հայալեզու հարթակը բնագիտամաթեմատիկական նոր նյութերով և տեսադասերով՝ հասանելի դարձնելով դրանք ողջ հանրությանը։   Աշխատարանների ծրագրի ամփոփումը կատարվեց երկու միջոցառմամբ, որոնք տեղի ունեցան Էջմիածնի «Էորնեկյան» դպրոցում և Գավառի Պ. Ղանդիլյանի անվան թիվ 2 միջնակարգ դպրոցում։ Յուրաքանչյուր մարզից 3 ուսուցչի շնորհվեց «Քան» ակադեմիայի դեսպան-ուսուցչի կոչում՝ հնարավորություն տալով իրենց ակտիվությամբ աչքի ընկած մասնագետներին սեփական փորձը ներկայացնելու համայնքներում։ Բացի վերապատրաստող դասընթացներից՝ նաև կազմակերպվել էր աշակերտական մեկամսյա մրցույթ՝ երեխաներին թույլ տալով սովորել և չափելի դարձնել իրենց գիտելիքի աճը։ Արմավիրի մարզում լավագույնը ճանաչվեց Վաղարշապատի Մաշտոցի անվան  թիվ 1 դպրոցի սան Գալինա Ջահինյանը՝ 2 417 950 միավորով:     Գեղարքունիքի մարզում՝ Վարդենիսի թիվ 4 հիմնական դպրոցի սան Մարի Ղարիբյանը, որ հավաքել էր 10 050 390 միավոր։ Սա լավագույն ցուցանիշն է «Քան» ակադեմիայի աշակերտական մրցույթների բոլոր մասնակիցների շրջանում։     Ամփոփիչ միջոցառմանը «Այբ» կրթական հիմնադրամի գործադիր տնօրեն Սոնա Կոշեցյանը նշեց, որ հաճելիորեն զարմացած է ոչ պարտադիր կրթական հարթակում սովորելու երեխաների ցանկությունից. «Ուրախ եմ, որ «Քան» ակադեմիան ամրացնում է թե՛ ուսուցիչների, թե՛ աշակերտների ինքնակրթության ձգտումը»։   Ըստ Արմավիրի մարզպետարանի կրթության, մշակույթի և սպորտի վարչության պետ Սոնյա Բուդաղյանի՝ մարզի դպրոցներն առաջին անգամ են մասնակցում «Քան» ակադեմիայի մարզային աշխատարաններին. «Ուրախ եմ նման արդյունքի համար։ Արդյունավետ ու որակյալ կրթությունն ամենակարևորն է։ Հույս ունեմ՝ ծրագրի բոլոր մասնակիցներն իրենք էլ կտարածեն կրթական նման ռեսուրսների և հնարավորությունների մասին իրենց իմացածը»։   Նիյր Իսթ Ֆաունդեյշնի հայաստանյան մասնաճյուղի տնօրեն Արփինե Բաղդոյանն ընդգծեց, որ որակյալ կրթական ռեսուրսներ ունենալն ու բարձր նշաձողի հասնելն առանցքային են երկրի զարգացման և ապագայի համար. «Ուրախ ենք, որ մեր ծրագիրը հնարավորություն տվեց աջակցելու և մեր ներդրումն ունենալու մարզերում այս գեղեցիկ կրթական հարթակի տարածմանը»։       «ՁԳՏՈՒՄ ավելի լավ ապագայի. համայնքների և քաղաքացիական հասարակության դիմակայունություն Հայաստանում» (STRIVE) ծրագիրը համաֆինանսավորում է Եվրոպական միությունը և իրականացնում է  ՆԵՖ Բելգիան՝ գործընկերությամբ «ԱԳԱԹ» հաշմանդամություն ունեցող կանանց իրավունքների պաշտպանության կենտրոն ՀԿ-ի, «ԲԼԵՋԱՆ» բնապահպանական, սոցիալական, բիզնեսի աջակցության ՀԿ-ի, «Դիլիջանի երիտասարդների համագործակցության կենտրոն» ՀԿ-ի և Կանանց զարգացման «Ռեսուրս կենտրոն» հիմնադրամի:   «Այբ» կրթական հիմնադրամը կրթության հավասար հնարավորություններ ստեղծելու նպատակով 2017-ից հայերենով տեղայնացնում է աշխարհի ամենամեծ առցանց կրթական հարթակի՝ «Քան» ակադեմիայի շտեմարանը, որը հասանելի է աշխարհի 190 երկրում, 50 լեզվով և  135 մլն օգտատիրոջ։