«Այբ» կրթական շարժման գաղափարը մարդկային կյանքը և մեր երկրի ապագան կրթությամբ վերափոխելն է: Մենք հավատում ենք, որ կարող ենք ունենալ միջազգային հարթակներում մրցունակ և ճանաչելի կրթական համակարգ, և մեր ջանքերն ուղղում ենք 21-րդ դարի հայկական կրթության լավագույն մոդելի ստեղծմանն ու տարածմանը։ «Այբ» կրթական հիմնադրամի իրականացրած ամեն ծրագիր կամ նախաձեռնություն ուղղված է այս լուսավոր նպատակին, որն իրականացնում են «Այբ» գաղափարի շուրջ համախմբված նվիրյալներ ու աջակիցներ։
 

«Այբ»-ը հիմնադրել են 2006 թվականին մարդիկ, ովքեր իրենց ձեռքբերումները համարում են կրթության արդյունք և կամենում միասնական ներդրմամբ ստեղծել Հայաստանում բարձրորակ կրթություն ապահովող համակարգեր: Ցանկանալով նպաստել երկրի զարգացմանը և ունենալով իրենց ժամանակը, ջանքերն ու նյութական միջոցները ներդնելու բազմաթիվ հնարավորություններ՝ «Այբ»-ի ութ հիմնադիրներն ընտրեցին երկիրը բարեփոխելու ամենաշնորհակալ և երաշխավորված ձևը` ստեղծել կրթության նոր մշակույթ և կրթել նոր սերունդ: «Այբ»-ի հիմնադիրները աշխարհի տարբեր երկրներում ապրող ու աշխատող, տարբեր մասնագիտությունների տեր հայորդիներ են։
 

 «Այբ» կրթական հիմնադրամի նպատակը սովորելու գերազանցության մշակույթ ձևավորելն ու հայկական կրթության զարգացմանն աջակցելն է։ Մեր համայնքն իր բոլոր ջանքերն ու ներդրումներն ուղղում է 21-րդ դարի մրցունակ, ստեղծարար, փոփոխությունների պատրաստ սերնդի զարգացմանը։

«Այբ» կրթական հիմնադրամի տեսլականը որակյալ կրթությունն ու գերազանցությունն է: Լինելով կրթության ոլորտում կարևոր փոփոխություններ և զարգացման ծրագրեր իրականացնող կազմակերպություն՝ «Այբ»-ն իր ծրագրերն իրականացնում է ամբողջ Հայաստանում, Արցախում և սփյուռքում՝ մեր երեխաներին 21-րդ դարի լավագույն կրթությամբ ապահովելու համար: Կրթական լավագույն նախաձեռնությունների իրականացման համար մեր ծրագրերը դարձել են յուրատեսակ փորձարարական դաշտ, որի հիման վրա մշակվում են կրթական ռազմավարություններ, վերլուծություններ և տեխնոլոգիաներ: Մեր ծրագրերում տարեկան ներգրավվում են շուրջ 125 000 մասնակից և 1100 ուսումնական հաստատություն ամբողջ Հայաստանից և Արցախից: «Այբ» կրթական հիմնադրամը նախաձեռնել է մեծածավալ կրթական նախաձեռնություններ՝ «Այբ» դպրոց, կրթաթոշակ «Այբ» ավագ դպրոց ընդունված աշակերտներին, Դիլիջանի կենտրոնական դպրոց, Արարատյան բակալավրիատ, դպրոցական զանգվածային մրցույթներ, «Քան» ակադեմիայի հայաստանյան գրասենյակ, «ԱյբԼաբ»-եր և բազմաթիվ այլ ծրագրեր, որոնք փոխում են հայկական կրթական իրականությունը:

«Այբ» կրթական հիմնադրամն իր առաքելության շուրջ միավորել է այբական գաղափարին հավատացող ամուր համայնք. շուրջ 250 բարերար ամբողջ աշխարհից աջակցում է մեր ծրագրերին:
 

Մենք նպատակ ունենք մեր հաջողված փորձը հասանելի դարձնելու բոլորին և Հայաստանը  վերածելու որակյալ կրթության երկրի, որտեղ որակյալ և ժամանակակից կրթությունը հասանելի է բոլոր երեխաներին: Կրթությունն է մեր ճանապարհը: