Դիլիջանի կենտրոնական դպրոցի կրթական փիլիսոփայությունն ու գործունեության կազմակերպումը խարսխված են հետևյալ ութ հիմնական սկզբունքի վրա:

Ամբողջական կրթություն

Դպրոցի նպատակն է՝ ձևավորել համակողմանի զարգացած, հոգեպես հարուստ և առողջ մարդկանց: Դպրոցում համադրվում են գիտությունները, հումանիտար առարկաները, արվեստներն ու սպորտը:

Խորացված կրթություն

Մենք աշակերտին հնարավորություն ենք ընձեռում խորանալու իր նախընտրած առարկաների մեջ, ուսումնասիրելու, ստեղծագործելու իրեն հետաքրքրող ուղղության մեջ:

Արժեքներ

Մեր նպատակն է՝ ձևավորել ոչ միայն գիտելիքներով զինված մարդ, այլև բարոյապես մաքուր, սեփական ինքնությանը հաղորդ, պատկանելության և պատասխանատվության գիտակցություն ունեցող քաղաքացի:

Համայնք

Յուրաքանչյուր դպրոցի ամենամեծ հարստություններից մեկը նրա շուրջ համախմբված համայնքն է՝ աշխատակիցներ, ուսուցիչներ, ծնողներ, աջակիցներ, գործընկերներ, ում ներկայությունը դպրոցում հարստացնում է ուսումնական առօրյան՝ տալով կրթությամբ կայանալու ու բարձունքների հասնելու վստահություն:

Միջավայր

Դիլիջանի կենտրոնական դպրոցը զինված է ստեղծագործ գաղափարների իրականացման համար անհրաժեշտ ժամանակակից տեխնոլոգիաներով, որպեսզի մեր աշակերտները համաքայլ ընթանան արագորեն զարգացող գիտությանը և իրական ժամանակում փորձարկեն ստացած գիտելիքները:

Ստեղծարարություն

Մենք ձգտում ենք առավել լայն բացել մարդու ստեղծագործական ներուժը, նպաստել նրա ստեղծագործ ակտիվության դրսևորմանն ու զարգացմանը: Մեր դպրոցի աշակերտները ներգրավված են իրական նախագծերում՝ կիրառելու ստացված գիտելիքները և կողմնորոշվելու հետագա մասնագիտության հարցում:

Աշխատելու արվեստ

Մեր դպրոցում բոլորը սիրում են աշխատել և աշխատելով սովորում են կառավարել ժամանակը, տարանջատել կարևորն անկարևորից, ձևավորել աշխատանքի արդյունավետ կազմակերպման այլ հմտություններ:

Ընկերային (հասարակական) պատասխանատվություն

Մենք մեր աշակերտների մոտ դաստիարակում ենք այնպիսի արժեքներ, ինչպիսին են փոխօգնությունը, դիմացինի կարծիքի հետ հաշվի նստելը, ուրիշի մտքերը և աշխատանքը գնահատելն ու չգողանալը և այլն: Երեխան պետք է կարևորի հանրային շահը և գիտակցի, որ իր արարքով կամ անգործությամբ ազդում է իր և այլոց կյանքի վրա: