Այսօր ծրագրի շրջանավարտները օրինակ են ծառայում իրենց քույր-եղբայրների, տարեկիցների համար և արդեն իրենք են իրենց գիտելիքներով, փորձով, կապերով աջակցում իրենց հետևորդներին՝ հարթելու ուղին դեպի կրթական բարձունքներ: Եվ այսօր արդեն ունենք առաջին քաղցր բերքը կրթության ոլորտում բարերարության սերմանումից։ Մեր դասընթացների շրջանավարտներից մեկը՝ Արսեն Մամիկոնյանը, ժամանակին ստանալով անհրաժեշտ աջակցություն գիտելիքների զարգացման համար, տեսնելով «Այբ» համայնքի անդամների ու մասնագետների ջերմությունն ու նվիրվածությունը, բուհն ավարտելուց հետո որոշում կայացրեց միանալ «Այբ»-ին՝ դառնալով «Այբ» ակումբի անդամ՝ իր ժամանակային ու նյութական ռեսուրսների գիտակցված ներդրմամբ օգնելով Հայաստանի կրթական ոլորտի զարգացմանը:

Հենց այս ծրագրի շրջանակներում է, որ ծնունդ է առել և փորձարկվել «Այբ» հիմնադրամի կողմից 2014 թվականին գործարկված Կրթության գերազանցության ազգային ծրագրի (ԿԳԱԾ) իրականացման գլխավոր գործիքը՝ «Արարատյան բակալավրիատ» դպրոցական կրթական ծրագիրը:

Արարատյան բակալավրիատը համաշխարհային մակարդակով մրցունակ և խստապահանջ ուսումնական ծրագիր է՝ նախատեսված 21-րդ դարի պետական և մասնավոր կրթական հաստատությունների համար: 2015 թ. դեկտեմբերին Արարատյան բակալավրիատը պաշտոնապես ճանաչվել է Հայաստանում՝ որպես այլընտրանքային կրթական ծրագիր, իսկ 2016 թվականի օգոստոսին այս հայալեզու ծրագիրն ստացել է նաև միջազգային ճանաչում՝ որպես աշխարհի առաջադեմ կրթական երկու հարթակներին՝ անգլիական Ա մակարդակին (A Levels) և ամերիկյան Advanced Placement-ին համազոր: