«Քան» ակադեմիայի հայաստանյան գրասենյակ - Մեր նախագծերը | «Այբ» կրթական հիմնադրամ
  • «Քան» ակադեմիայի հայաստանյան գրասենյակ
  • «Քան» ակադեմիայի հայաստանյան գրասենյակ

«Քան» ակադեմիայի հայաստանյան գրասենյակ

Հայ աշակերտներին լավագույն և մրցունակ կրթության մեկ այլ հնարավորություն ընձեռելու նպատակով «Այբ» կրթական հիմնադրամը 2017 թվականի հուլիսից սկսեց իրականացնել «Քան» ակադեմիայի հայաստանյան գրասենյակը, որն էլեկտրոնային ռեսուրսների թարգմանության ու ստեղծման նախագիծ է։  Ծրագիրն իրականացնում է «Այբ» կրթական հիմնադրամը՝ «Ինտելեկտուալ Ռենեսանս» հիմնադրամի հետ համագործակցությամբ։
 

Ինչ է «Քան» ակադեմիան

«Քան» ակադեմիան ոչ առևտրային կազմակերպություն է, որը ստեղծվել է 2006 թվականին և գործում է «Համաշխարհային մակարդակի անվճար կրթություն բոլորի համար, ամենուր » կարգախոսի ներքո։ Եվ հենց դրանից էլ բխում է կազմակերպության առաքելությունը, այն է՝ բարելավել կրթության որակը և այն դարձնել հասանելի ամենուրեք ու ամենքին: 
 

«Քան» ակադեմիան մշակում է կարճ տեսանյութեր, ինչպես նաև կազմում գործնական վարժություններ ու բացատրական նյութեր, որոնք հասանելի են ուսուցիչներին և աշակերտներին։
 

Այսօր «Քան» ակադեմիայի մշակած կրթական նյութերից օգտվում են լավագույն համալսարանների և դպրոցների աշակերտներն ու ուսանողները։ Եվ այսօր ավելի քան 36 երկիր միացել է այս նախագծին և ակտիվորեն թարգմանում է «Քան» ակադեմիայի կրթական նյութերը։
 

«Քան» ակադեմիան ոչ միայն ստեղծում է իր նյութերը, այլ նաև համագործակցում տարբեր կազմակերպությունների և ինստիտուտների հետ, որոնց թվում են՝
 

• Մասաչուսեթսի տեխնոլոգիական ինստիտուտը (MIT),
• Pixar-ը, 
• Ասպենի ինստիտուտը (The Aspen Institute), 
• ՆԱՍԱ-ն, 
• Արվեստի Մետրոպոլիտեն թանգարանը (Նյու Յորք), 
• Բրիտանական թանգարանը (Լոնդոն),
• Ժամանակակից արվեստի թանգարանը (Նյու Յորք),
• Ստանֆորդի բժշկական դպրոցը (Stanford School of Medicine)։
 

Ինչով է զբաղվում «Քան» ակադեմիայի հայաստանյան գրասենյակը

«Քան» ակադեմիայի առավելություններից մեկն այն է, որ կազմակերպությունը հնարավորություն է տալիս յուրաքանչյուր երկրի թարգմանելու և տարածելու նյութերը իր լեզվով՝ այդպիսով ընդլայնելով իր առաքելության ազդեցության շրջանակը։ Իր հերթին, ցանկանալով աջակցել հայ երեխաների ուսումնառության գործընթացին, ինչպես նաև օժանդակել հայ ուսուցիչներին դասավանդման գործընթացում, «Քան» ակադեմիայի հայաստանյան գրասենյակն առաջիկա երկու տարվա ընթացքում նպատակ ունի՝
 
• թարգմանելու «Քան» ակադեմիայի դպրոցական մաթեմատիկայի բաժնի տեսանյութերը, 
• ստեղծելու հայոց լեզվի քերականության բաժնի ամբողջական տեսանյութերի շարք (նախատեսվում է ստեղծել հայոց լեզվի շուրջ 250 տեսանյութերի շարք՝ բացատրական նյութերով և վարժություններով․ հայոց լեզվի տեսանյութերի շարքի մշակումը նախատեսվում է սկսել 2018 թ․ հունվարից)։
 
Դպրոցներն այս տեսանյութերը կօգտագործեն որպես հավելյալ ուսումնական նյութեր։
 
Առաջիկա երկու տարում ծրագիրը նաև նախատեսում է համագործակցել Հայաստանում գործող մի շարք գիտամշակութային կազմակերպությունների հետ, ինչպես նաև ընդլայնել ծրագրին աջակցող կամավորների շրջանակը ինչպես դպրոցներում, այնպես էլ համալսարաններում։
 
Այս նախագիծը հնարավորություն կտա մշակելու միանգամայն նոր կրթական ռեսուրսներ, որոնք, համահունչ լինելով ուսումնական ծրագրին, հասանելի կլինեն ամենուր։ Այս ծրագրի միջոցով Հայաստանը կարող է իր ակտիվ դերն ունենալ առցանց ուսումնական նյութերի մշակման մեջ։
 
2017 թ․ հուլիս-հոկտեմբեր ընկած ժամանակահատվածում «Քան» ակադեմիայի հայաստանյան գրասենյակը համալրվել է դպրոցական մաթեմատիկայի մի շարք նյութերով, որոնք արդեն ակտիվորեն օգտագործվում են Հայաստանի դպրոցների, մասնավորապես՝ աշակերտների և ուսուցիչների կողմից։ Վերոնշյալ ժամանակահատվածում «Քան» ակադեմիայի հայաստանյան գրասենյակը համալրվել է դպրոցական մաթեմատիկայի՝
 
• շուրջ 700 տեսանյութով, 
• շուրջ 400 բացատրական նյութով, 
• 400 վարժությունների շարքով։

Այս տեսանյութերը հասանելի են «Քան» ակադեմիայի հայաստանյան գրասենյակի պաշտոնական «Յութուբի» էջում, իսկ կայքը՝ վերոնշյալ բոլոր նյութերով, հասանելի կլինի հետևյալ հղումով։ Կայքի միջոցով ուսուցիչներն ու մարզիչները   հնարավորություն կունենան ստեղծելու առցանց դասարան, որտեղ կարող են առաջադրանքներ հանձնարարել իրենց աշակերտներին և ստուգել նրանց առաջադիմությունը տվյալ առարկայից։

 

Ավելին

ավելի քան 1 միլիոն

ուսուցողական նյութ է ստեղծել Քան Ակադեմիան

որոնք օգտագործվում են 40 միլիոն աշակերտների ու 2 միլիոն ուսուցիչների կողմից։

  • «Քան» ակադեմիայի հայաստանյան գրասենյակ

36

տարբեր լեզուներով՝ ներառյալ հայերենով հասանելի են Քան ակադեմիայի նյութերը։

24 միլիոն

դիտում 2012 թվականին

200 միլիոն

դիտում 2016 թվականին