Բնագիտության ուսանողական մրցաշար

Բնագիտության ուսանողական մրցաշարն (ԲՈՒՄ) «Այբ» կրթական հիմնադրամի՝ բարձրագույն կրթության ոլորտում տաղանդավոր երիտասարդների բացահայտմանն ուղղված ծրագիր է: Այն 2010 թ.-ից դպրոցականների համար կազմակերպվող Պատանի քիմիկոսների մրցաշարի (ՊՔՄ) տրամաբանական շարունակությունն է և գալիս է ընդլայնելու 2020-ին մեկնարկած Ուսանող քիմիկոսների մրցաշարը՝ ընդգրկելով ոչ միայն քիմիան, այլև բնագիտական մյուս ոլորտները։

Նպատակը

- Ստեղծել ընդհանուր հարթակ բնական գիտություններով զբաղվող ուսանողների համար

- Խթանել ամենաարդիական խնդիրների բազմակողմանի լուծումներ գտնելու մշակույթը

- Կամրջել երիտասարդ մասնագետներին և գործատուներին

- Նպաստել Հայաստանի Հանրապետությունում և Արցախում գիտական մտքի զարգացմանն ու ուժեղ համայնքի ձևավորմանը

Ում համար է մրցաշարը

Սա հրաշալի հնարավորություն է Հայաստանի Հանրապետության և Արցախի բուհերում կենսաբանություն, ֆիզիկա և քիմիա ուսումնասիրող ուսանողների համար՝

- կիրառելու գիտելիքներն ամենաարդի խնդիրների լուծման մեջ,

- գնահատելի և ճանաչելի դառնալու մասնագիտական համայնքի համար,

- ապահովելու բնական գիտություններով հետաքրքրված անհատների միջև կապ,

- մաս դառնալու գիտական մեծ համայնքի։

Մրցաշարը թիմային է։ Յուրաքանչյուր թիմ ունի 4-5 ուսանող անդամ և պետք է ունենա ավագ։ Մասնակցելու համար անհրաժեշտ է լրացնել գրանցման հայտը։

Ձևաչափը

Մրցաշարի ընթացքում սպասվում են գիտական փորձեր, անակնկալ առաջադրանքներ, ինչպես նաև կիսաեզրափակիչ և եզրափակիչ մարտեր՝ սեփական նախագծային աշխատանքը ներկայացնելու հնարավորությամբ։

Մասնակից թիմերն ազատ են որոշելու իրենց հետազոտության ծավալը և բնույթը (տեսական, գործնական)։ Յուրաքանչյուր տարի ունենալու է իր թեմատիկ ուղղվածությունը՝ ռազմականից մինչև էկոլոգիական։ Իմացիր ավելին՝ ծանոթանալով մրցաշարի կարգին։

Տարբերանշանի պատմությունը

Մրցաշարն ունի իր պատմությամբ ու խորհրդով յուրահատուկ տարբերանշան։

Բնագիտության ուսանողական մրցաշարի (ԲՈՒՄ) տարբերանշանի հիմքում ընկած է շումերական saĝ (գլուխ) պատկերագրի ժամանակային փոխակերպումների արդյունք սեպագիրը՝ խորհրդանշելով գիտության զարգացող-կերպափոխվող բնույթը:

Սեպագիրն ունի նաև փոխաբերական նշանակություններ՝ սկիզբ, գլխավոր, առաջնակարգ։ Այս իմաստով այն շաղկապվում է բնական գիտությունների՝ որևէ բան առաջ բերող, բխեցնող էության հետ:

Սեպագրի հորիզոնական տարրերը հիշեցնում են շեփորներ և ամփոփում դեպի բնագիտություն նոր սերունդներին կանչելու մեր ձգտումն ու ուղերձը։

Ուղղահայաց 3 սյունն էլ՝ կապված հորիզոնական տարրերով, խորհրդանշում են մի կողմից բնական գիտություններից յուրաքանչյուրի ինքնուրույնությունը, մյուս կողմից՝ փոխկապվածությունը, որը նրանց միավորում է մեկ համակարգում։

Մրցաշարն անցնելու է «Գիտության ԲՈՒՄերանգ» կարգախոսի ներքո՝ խորհրդանշելով ամեն նոր սերնդի՝ բումերանգի նմանվող անընդհատ վերադարձը գիտության աշխարհ։