«Այբ» կրթական հիմնադրամը «Վոլֆրամ Ռիսըրչ» (Wolfram Research) ընկերության հետ համագործակցությամբ հնարավորություն է ընձեռում հայ աշակերտներին մասնակցելու «Մաթեմատիկա» ամառային ճամբարի ծրագրին (Mathematica Summer Camp): «Մաթեմատիկա» ամառային ճամբարն ինտենսիվ 12-օրյա ծրագիր է ավագ դպրոցի աշակերտների համար, ովքեր պատրաստվում են ուսումը շարունակել 11-րդ և 12-րդ դասարաններում: Ճամբարում աշակերտները դասախոսություններին մասնակցելու և ծրագրեր ստեղծելու միջոցով սովորում են ժամանակակից ծրագրավորման և մաթեմատիկական հաշվարկներ կատարելու մեթոդներ: Ճամբարը հնարավորություն է ընձեռում գործնականում աշխատել «Վոլֆրամ Ռիսըրչ» ընկերության թիմի և ուսուցիչների հետ, համագործակցել տարեկիցների հետ, ստանալ փորձագիտական կարծիքներ և սովորել աշխատել անհատապես: Հիմնվելով աշակերտների՝ ծրագրավորման հմտությունների և նախընտրած առարկաների վրա, հանձնարարվում են տնային աշխատանքներ և անհատական նախագծեր: